Cup Punteglias cun fetg buna participaziun

Dacuort ha giu liug a Trun il turnier tradiziunal dil Cup Punteglias . Cun varga 40 annunzias ei la participaziun stada fetg cuntenteivla per il meinaturnier Erich Decurtins. Sulettamein il tableau da 35 plus R5/R9 ha stui vegnir strihaus cun mo 2 annunzias.  Malgrad la plievgia dalla sonda che ha caschunau per ina pli liunga interrupziun,  ha il club da tennis giu cletg cun l’aura. Grazia alla buna collaboraziun cun il Club da tennis Danis-Tavanasa che ha mes a disposiziun ils agens plazs, eis ei lu tuttina reussiu da dumignar atras tuts giugs previ per quei di. Aschia ei lu vegniu giugau la dumengia a Trun ils miez- ed ils finals. Naturalmein ei era quella occurrenza stada signada dallas mesiras da schurmetg da COVID-19, prescretas da Swisstennis. Ins ha saviu constatar che giugaduras, giugadurs ed era ils aspectaturs han mussau buna disciplina e priu serius las mesiras da distanza, higiena e da registraziun.  

Categoria umens singul 55 plus R 5 – R 9

Suenter ils giugs da gruppa spiardan ils finalists digl onn vargau dil Club da tennis Trun lur miezfinal: Gion Petschen encunter Richard Riedi 1:6/0:6 ed Erich Decurtins, il victur digl onn2019 encunter Arthur Cantieni 2:6/2:6. Il final ei staus ina clara caussa pil ferm giugadur dil Club da tennis Cuera Richard Riedi, che gudogna encunter igl anteriur president dil Club da tennis Trun Arthur Cantieni 6:1/6:1

Dretg, Richard Riedi, victur dalla categoria 55+ R5/R9 e seniester il secund, Arthur Cantieni

Categoria umens singul 35+ R7/R9

Sco tier tuttas categorias ei era vegniu giugau tier quella en gruppas. El final fruntan ils dus victurs Luis Caduff, Club da tennis Trun ed Anton Schmid, Club da tennis Danis-Tavanasa in encunter l’auter. Luis Caduff gudogna lu claramein la lutga finala cun 6:2/6:0 ed aschia per l’emprema gada il Cup Punteglias.

Dretg Luis Caduff, victur dalla categoria 35+ R7/R9  e seniester  il secund, Anton Schmid

Categoria damas R4 – R9

In legreivel fatg ei che l’entira equipa dallas giuvnas dalla 2. ligia dil CT Trun ei separticipada al Cup Punteglias. Tuttina eis ei lu la finfinala stau las giugaduras rutinadas dalla equipa dalla 1. ligia dil CT Trun ch’ein sequalificadas pils miez finals. Leu batta Paula Nay en in giug zun intensiv sia collega d’equipa Sereina Decurtins cun 6:4/2:6/10:6 e medemamein gudogna Carmen Bearth – Albin encunter Silvana Guldimann – Giger cun 6:1/6:4. El final victorisescha Carmen Bearth – Albin encunter Paula Nay 6:3/6:0 e gudogna aschia suenter 2015 per la secunda gada il Cup Punteglias.

Dretg, Carmen Bearth – Albin, victura dalla categoria R4/R9 e seniester la secunda, Paula Nay

Categoria damas 30 + R4 – R9

Suenter ils giugs da gruppa fruntan las duas victuras Ursula Huonder, CT Mustér e Manuela Decurtins, CT Trun el final ina sin l’autra. Cun 7:5/6:2 gudogna Manuela Decurtins suenter 2018 per la secunda gada il Cup Punteglias.

Dretg, Manuela Decurtins victura dalla categoria 30+ R4/R9 e seniester  la finalista, Ursula Huonder