Cup Crestas 2020

Detg buna participaziun

Dacuort ha giu liug il tradiziunal turnier Cup Crestas dil club da tennis Trun. Vegnius giugau eis ei ellas categorias: umens R5/R9, umens R7/R9 e dubel-mix R1/R9. Cun total 24 participonts ellas categorias da singuls ed 11 equipas tiel dubel-mix, ha il meinaturnier Erich Decurtins saviu beneventar tontas participontas e participonts sco dapi biars onns buca pli. Quei suenter ch’ei era stau da constatar ils davos onns in d’igren continuond. Forsa ei quei d’attribuir al sistem ch’ei vegn giugau ellas rundas preliminaras tier tuttas categorias en gruppas. Aschaia che mintga giugadur e mintga giugadura ha il minimum da dar dus giugs. Il turnier dil Club da tennis Trun ei era staus signaus dallas prescrepziuns das segirtad el dil concept da schurmetg en connex cun COVID-19. Ils responsabels han saviu constatar che giugaduras, giugadurs ed aspectaturs ein seteni senza pli gronds incaps vid las prescrepziuns rigurusas.  

Categoria umens singul R5/R9, victoria per Krättli Raulo R6, TC Vaz-sut

Suenter ils giugs da gruppa semesiran el miez final Luca Billeter, TC Chiasso, encunter Raulo Krättli, TC Vaz-sut. Cheu datti ina clara victoria per Krättli che batta siu adversari cun 6:3/6:3. Pli uliva ei la partida dil secund miezfinal denter Jonas Cahenzli, TC Vaz-sut e Florinan Zanin, CT Mustér. Gl’emprem set gudogna Zanin claramein cun 6:3, spiarda denton il secund cun empau discletg cun 6:4. Aschia sto il „Champions Tiebrak“ decider. Cheu ha bein la calira e la differenza da vegliadetga da 17 onns(!) denter Cahenzli e Zanin favorisau il giuven giugadur da Vaz–sut che qudogna quei tierz set cun 10:4. El final batta lu  Krättli siu camerad dil TC Vaz-sut cun 6:/6:2 e gudogna aschia il turnier.

Rangaziun 1.Raulo Krättli R6, 2. Jonas Cahenzli R5, 3.Luca Billeter R5, 4. Florian Zanin R5

Categoria umens singul R7 – R9 , victoria per Roger Vetsch, CT Glion Suenter ils giugs da gruppa fruntan el miez final ils giugadus dil CT Glion, Roger Vetsch e Giuseppe D’Atria in encunter lauter. Vetsch gudogna claramein encunter siu cumpogn da Glion en dus sets cun 6:1/6:4. El secund miez final dat ei la lutga denter Patrizio Decurtins dil CT Trun e Nicolai Seiler dil CT Danis/Tavanasa chil giuven da Trun gudogna cun 6:1/6:3. Il final denter Vetsch e Decurtins ei fetg ulivs e da bien nivo. Suenter ina dira lutga gudogna la finfinala Vetsch cun 5:7/7:6/10:7.

Rangaziun 1.Roger Vetsch R7, 2. Patrizio Decuritns R7, 3.Giuseppe D’Atria R7, 4. Nicolai Seiler R7

Categoria dubel/mix, victoria per Linus Tschalèr/Valeria Schmid

Cun 11 equipas ei il tableua dil dubel/mix staus occupaus fetg bein. E cheu ei vegniu giugau igl emprem en gruppas ed ils victurs da mintga gruppa ein sequalificai pil miezfinal.  Ella emprema scuntrada battan ils Tessines Billeter/Lunini il duo da Trun, Petschen/Nay cun 4:6/7:5/10:7. Il secund meizfinal ei ina dira lutga denter dil duo dil CT Trun, Decurtins/Bearth e Tschalèr (CT Glion)/Schmid (TC Danis/Tavanas) che va la finfinala cun 7:6/7:6 en favur da Tschalèr/Schmid. Il final gudogna lu il duo da Glion/Danis-Tavanasa en 3 sets cun 3:6/6:2/10:6  encunter il duo Tessines.

Rangaziun 1.Linus Tschalèr (CT Glion)/Valeria Schmid (CT Danis-Tavanasa), 2. Luca Billeter/Giovanna Lunini (CT Chiasso), 3. Simon Decurtins/Carmen Bearth-Albin (CT Trun), 4. Gion Petschen/Paula Nay (CT Trun)

Ils finalists  dil dubel/mix Dretg ils victurs Valeria Schmid e Linus Tschalèr, seniester ils secunds Luca Billeter e Giovanna Lunini

Ils finalists R7 – R9 Seniester il victur Roger Vetsch TC Glion,  dretg il secund, Patrizio Decurtins, CT Trun

  Ils finalists  R5 – R9 Seniester il victur Raulo Krättli, CT Vaz-sut, dretg il secund Jonas Cahenzli, TC Vaz-sut